舊文重溫
對唔住，愈大嘅人愈難講出口，曾經以為好平常嘅對唔住，想聽到都唔係咁易，特別係一句真心嘅對唔住
大家成日笑黎明講金句，不過尋日佢示範咗一句新金句：
「對唔住」
今時今日，肯認錯，肯講對唔住係我問題嘅人仲有幾多？
學子華話齋，今日我哋個個都係石堅，唔到山窮水盡，窮途末路都唔會講對唔住。
我哋會諗萬千個解釋，將責任歸咎於唔同問題，但自己嘅責任，永遠都放係最最最最後。
防火物料，可能係Production Team錯，可能係同政府部門溝通嘅錯，又或者係前線員工疏忽，供應商博大霧，甚至係天氣嘅錯、Eric Chan嘅錯。
講真，黎明專注唱歌同排舞，大家分工合作，理論上，唔關佢事。
但人去到某個位，下面問題、同事問題、天氣問題都好，你唔係制造問題嘅人都好，你作為最高負責人，作為老闆，你都要承擔。
諗返起之前「國立」事件，特首推俾劉江華，劉江華重覆康文署聲明，大跳卸膊操，今次黎明一句對唔住，比起千萬字聲明更有力。
諗起小學個陣老師迫我當眾道歉講對唔住，佢講咗句：「無人喜歡講對唔住，但有錯，你愈唔想講，就愈要迫自己講，咁做你先唔會再輕易俾自己犯錯。」
一向唔太喜歡黎明，但今次，我無辦法唔欣賞佢。
Search